Preto de 33.500 persoas teñen dereito a voto nestes comicios entre os campus de Santiago e Lugo
A comunidade universitaria da USC elixe hoxe ao novo reitor da institución académica para un mandato de catro anos que culminará no 2014. A desta xornada será a volta definitiva dun proceso electoral ao que inicialmente optaron sete candidatos, o maior número nas universidades españolas. A primeira convocatoria, celebrada a principios de maio, deixou sen opcións a cinco deles. Juan Casares Long e Lourenzo Fernández Prieto, os máis votados entón, disputaranse hoxe un cargo para o que teñen dereito ao voto 33.445 persoas entre os campus de Santiago e Lugo.
As votacións desenvolveranse entre as 10.30 e as 18.30 horas nas mesas distribuídas nos centros composteláns e lucenses, así como no Colexio santiagués de San Xerome e no lucense Edificio Intercentros.
Juan Casares Long, candidato independente, é catedrático de Enxeñería Química e preséntase por segunda vez consecutiva ás eleccións ao Reitorado. Lourenzo Fernández Prieto, catedrático de Historia Contemporánea e que se presenta co apoio da plataforma docente Universidade Aberta, foi vicerreitor co goberno de Senén Barro ata marzo do pasado ano, en que deixou o cargo.
O censo electoral entre o cadro docente e investigador repártese entre 1.348 profesores do sector funcionario doutor, que representan o 51% do voto ponderado, e o resto do persoal docente e investigador, que ten o 14% do voto ponderado e que está integrado por funcionarios non doutores, contratados doutores, colaboradores ou axudantes de doutor e axudantes, que suman un colectivo de 1.173.
O sector de investigadores en formación e estudantes de terceiro ciclo e posgrao suman 3.124, cunha representación no voto ponderado do 3%. O 24% dese voto corresponde aos estudantes de primeiro e segundo ciclo, o colectivo máis numeroso dentro da comunidade universitaria, composto por 26.549 persoas, mentres que o persoal de administración e servizos (con 1.251 integrantes) achega o 8% restante.
As urnas decidirán hoxe e a proclamación definitiva do novo reitor farase o próximo 4 de xuño, un mes logo da celebración da primeira volta do proceso
